உலகின் தலைசிறந்த சொல் செயல்

செயல்படுத்தப்படாத எந்த ஒரு சொல்லுக்கும் இவ்வுலகில் மதிப்பில்லை. தான் செயல்படுத்தாத எந்த ஒரு செயலை சொல்லும் மனிதனுக்கும் இங்கே மதிப்பில்லை.

ஆனால் பின்பற்றப் படாத வார்த்தைகளோடு நகர்ந்து கொண்டிருக்கிறது நமது வாழ்க்கை. செயலில் இல்லாத சொற்களை எளிதில் உபதேசித்து விடுகிறோம். சொல்வதற்கு வார்த்தைகள் ஏராளம் உள்ளன. செய்வதற்கு நாம் இயலாதவர்களாக ஆகி விடுகிறோம்.

இதை திருவள்ளுவர் பின்வருமாறு குறிப்பிடுகிறார்.

சொல்லுதல் யார்க்கும் எளிய அரியவாம்
சொல்லிய வண்ணம் செயல்

(குறள் எண்:664)

ஒரு செயலை இவ்வாறு செய்யலாம் என்று சொல்லுதல் எல்லோர்க்கும் எளியவாம்; சொல்லிய வண்ணமே செய்து முடித்தல் கடினம் ஆகும் என்பது இதன் பொருள்.

மதுவின் தீங்கு குறித்து பகலெல்லாம் உரையாற்றி விட்டு இரவில் மது அருந்துபவரின் மதிப்பு என்னவாக இருக்க முடியும்? பெண்ணுரிமை குறித்து முழங்கி விட்டு தனது மனைவியை அடிப்பவரின் மதிப்பு என்னவாக இருக்க முடியும்?

நீங்கள் உங்கள் மனைவியை நேசிக்கின்றீர்கள், நேசிப்பதாய் அவளிடம் சொல்கின்றீர்கள் ஆனால் அவளது தேவையை பூர்த்தி செய்ய தவறும்போது மனைவியிடமிருந்து அன்பை எதிர்பார்க்க முடியுமா?

உங்கள் பிள்ளைகளின் மீது அதீத அன்பு செலுத்துகின்றீர்கள் ஆனால் ஒரு தந்தையாக உங்கள் கடமையை செய்ய மறுக்கும் உங்களை உங்கள் பிள்ளைகள் மதிப்பார்களா?

உங்கள் மனைவியை நீங்கள் எவ்வளவு நேசித்தாலும், உங்கள் பிள்ளைகளின் மீது எவ்வளவு அன்பு செலுத்தினாலும் அவர்கள் மீதான உங்கள் கடமையை நீங்கள் செயல்படுத்தும்போது மட்டுமே உங்களின் நேசம் உங்களின் அன்பு புரிந்து கொள்ளப்படுகிறது. இல்லையேல் கைசேதமே…

இது போலவே ஒரு முஸ்லிம் என்பவன்

“லாயிலாஹ இல்லல்லாஹு முஹம்மதுர் ரசூலுல்லாஹ்” – அல்லாஹுவைத் தவிர வேறு இறைவன் இல்லை; முஹம்மது(ஸல்) அவர்கள் அல்லாஹுவின் திருத்தூதர் ஆவார்கள்.

என சொல்லி அதை முழு மனதாக ஏற்க வேண்டும்.

மேலும் தான் சொன்ன கலிமாவை உண்மைபடுத்தும் விதமாக ஒவ்வொரு முஸ்லிமும்

1) அல்லாஹ்வை வணங்கவும், அவனுக்கு எதையும் இணைவைக்காமலிருக்கவும் வேண்டும்.

2) தொழுகையை நிலைநிறுத்த வேண்டும்.

3) கடமையான ‘ஸக்காத்’ (ஏழை வரி) வழங்க வேண்டும்.

4) ரமலான் மாதத்தில் நோன்பு நோற்க வேண்டும்.

5) வசதி படைத்தோர் ஹஜ் பயணம் மேற்கொள்ள வேண்டும்.

மேற்சொன்ன செயல்களே நாளை மறுமையில் இறைவனிடத்திலே நீங்கள் முஸ்லிம் என்பதாக சாட்சி பகரும். மாறாக செயல்படுத்த தவறிய நீங்கள் ஒரு முஸ்லிம் என சொன்னாலும் அதற்கு உரித்தான எந்த செயலும் இல்லாதபோது இறைவன் முன் கைசேதமே.

வல்ல இறைவன் நம் அனைவருக்கும் கலிமாவை மொழிந்து அதன்படி நடக்கக்கூடிய பாக்கியத்தை தந்தருள்வானாக…..

– முஹம்மது சிராஜுத்தீன்

ஓ கஃபாவே !!!

1

உனக்குத்தான் எத்தனை சிறப்பு. உலகின் அனைத்து முஸ்லிம்களும் தொழுகையின்போது உன்னை நோக்கியே தொழுகின்றனர். நிற இன பேதமின்றி ஏழை பணக்காரன் பேதமின்றி உன்னை நோக்கி வருகின்றனர்.

நீ வல்ல இறைவனால் அபய பூமி என்றும் அறிவிக்கப்பட்டாய்.அபயபூமி என அறிவித்து 14 நூற்றாண்டுகளைக் கடந்த பின்பும், எத்தனையோ ஆட்சி மாற்றங்கள் நடந்த பின்பும் நீ இன்றளவும் அபயபூமியாகவே இருக்கிறாய். 14 நூற்றாண்டுகளாக எந்தத் தாக்குதலுக்கும் உள்ளாகாத வரலாற்று சிறப்பு மிக்க ஆலயமாகவும் நீ இருந்து வருகிறாய்.

முஹம்மது நபி (ஸல்) அவர்கள் ”ஹஸ்வா” என்ற ஒட்டகத்தின் மீது நின்றவர்களாக நீ அமைந்திருக்கும் மக்காவை நோக்கி, ”நீ தான் அல்லாஹ்வுடைய பூமியில் சிறந்த ஊராவாய்! அல்லாஹ்வுடைய பூமியில் மிகவும் விருப்பத்திற்குரிய ஊராவாய்! என்னுடைய சமுதாயம் (உன்னை விட்டும்) என்னை வெளியேற்றி இருக்காவிட்டால் நான் வெளியேறி இருக்க மாட்டேன். (ஆனால், அவர்களோ என்னை வெளியேற்றி விட்டார்கள்.)” என்று கூறினார்கள்.

-அப்துல்லாஹ் பின்அதீ (ரலி) (திர்மிதீ 3860).

மக்காவை நோக்கி நபி (ஸல்) அவர்கள் கூறிய இச்சொற்கள், உன் சிறப்பை உறுதிபடுத்துகின்றன.

மேலும் அபீஸீனிய மன்னனின் ஆட்சியில் ஏமன் நாட்டின் பிரதிநிதியாக செயல்பட்டு வந்த ஆப்ரஹா என்பவன் கி.பி. 571-ல் பிரமாண்டமான யானைப் படை ஒன்றைத் தயார் செய்து உன்னை இடிப்பதற்காக அனுப்பிவைத்தான், அதை அழிப்பதற்காக அபாபீல் என்ற பறவைகளின் சொண்டுகிளில் சூடேற்றப்பட்ட கற்களை கவ்விக்கொண்டு வரச் செய்து, அந்தப்படையை மெண்டு துப்பிய வைக்கோலைப்போல் அல்லாஹ் ஆக்கினான்.

இங்கு என்னால் ஒரு கேள்வி எழுவதை தடுக்க முடியவில்லை. உனக்கு ஏன் இத்தனை சிறப்பு. படைத்த இறைவனே உன்னை நேரடியாக பாதுகாக்கவேண்டிய அவசியமென்ன ?

உண்மையை சொல்வதென்றால் நீ கற்களால் கட்டப்பட்ட ஒரு சாதாரண கட்டிடம். எந்த ஒரு பொறியாளருடைய உழைப்பும் சிந்தனையும் தேவைப்படாத ஒரு சதுர வடிவிலான கட்டிடம். இன்னும் உன்னைச்சுற்றி பலநூறு மாடிகள் கொண்ட அழகான கட்டிடங்கள் இருக்க உனக்கு மட்டும் ஏன் இந்த சிறப்பு ?

உலக மக்கள் அனைவரும் உன்னை நோக்கி தொழுவதினாலா ? அனைத்து மக்களை நீ அரவணைத்துக்கொள்வதினாலா ? நீ அபயமளிக்கப்பட்ட பூமி என்பதினாலா ? நிச்சயம் இவை மட்டுமே உன் சிறப்புக்கு காரணமாக இருக்கவே முடியாது..

இந்த கேள்விக்கு விடைதேடி நான் பல்லாயிரம் ஆண்டுக்கு முந்தைய ஒரு வரலாற்று பயணம் மேற்கொள்கிறேன்.

இப்பொழுது நீ இருக்கும் அதே இடம் ஆனால் அது யாருமில்லா பாலைவனம். மனிதர்கள் வாழ தகுதியற்ற பாலைவனம். ஆதம் (அலை) அவர்கள் காலத்திலேயே நீ கட்டப்பட்டுவிட்டாய் என்றபோதினும் உனக்கு இப்பொழுது இருக்கும் சிறப்பு அப்பொழுது இல்லை. ஒருவர் தன் மனைவி மற்றும் பிறந்து சிறிது நாட்களேயான தன் குழந்தையுடன் நீ இருக்கும் இடத்தை நோக்கி வருகிறார். பல ஆண்டு குழந்தை பாக்கியமில்லாமல் இறைவனிடம் வேண்டி பெற்ற குழந்தை அது.

இறைவனிடத்தில் இருந்து செய்தி இல்லை கட்டளை. உன் மனைவியையும் குழந்தையையும் யாருமே வாழாத வாழமுடியாத இந்த பாலைவனத்தில் விட்டுச் செல். எந்த ஆண் மகனுக்கும் செய்ய இயலாத ஒரு செயல். ஆனால் வேறு வழியில்லை இறைவனின் கட்டளை ஆயிற்றே. அவர் அவ்வாறே செய்கிறார்.பின் இறைவனிடம் பின்வருமாறு துஆ செய்கிறார்.

எங்கள் இறைவனே! நிச்சயமாக நான் என் சந்ததிகளை, மிக்க கண்ணியம் வாய்ந்த உன் வீட்டின் சமீபமாக வசித்திருக்கச் செய்து விட்டேன். அது விவசாயமற்றதொரு பள்ளத்தாக்கு! எங்கள் இறைவனே! அவர்கள் (உன்னைத்) தொழுது கொண்டிருப்பதற்காக (அங்கு வசிக்கச் செய்தேன்.) மனிதர்களில் ஒரு தொகையினரின் உள்ளங்கள் அவர்களை நோக்கும்படி நீ செய்வாயாக! (பற்பல) கனி வர்க்கங்களையும் நீ அவர்களுக்கு உணவாக அளித்து வருவாயாக! (அதற்கு) அவர்கள் உனக்கு நன்றி செலுத்துவார்கள்.

-அல்குர்ஆன் (14 : 37)

இறைவனின் கட்டளை என்பதால் இப்ராஹீம் (அலை) அவர்களுடைய மனைவி ஹாஜிரா (அலை) இதை ஆட்சேபிக்காமல் ஏற்றுக்கொள்கிறார். யாருமே வாழமுடியாத இடமாக இருந்தால் என்ன, பாதுகாப்பளிப்பது இறைவன் அல்லவா. ஆனால் அவ்வளவு எளிது அல்லவே பாலைவனத்தில் வாழ்வது. தன் சிறு குழந்தைக்கு தண்ணீர் தாகம், அழ ஆரம்பித்துவிட்டது. பெற்ற தாய் துடியாய் துடிக்கிறார். இந்த பாலைவனத்தில் நான் தண்ணீருக்கு எங்கே செல்வேன். அதோ தென்படுகிறது தண்ணீர் ஓடுகிறார் அது காணல் நீர் என்பதை அறியாமல். ஸஃபா என்னும் குன்றிலிருந்து மர்வா என்னும் குன்றுவரை ஒருமுறை அல்ல இருமுறை அல்ல ஏழுமுறை.அல்ஹம்துலில்லாஹ் அல்லாஹ் உதவி புரிந்தான்.

ஆம் அல்லாஹ்வின் உதவி ஹாஜிரா (அலை) அவர்களுக்கு கிடைத்தேவிட்டது. பாறைகள் நிறைந்த தண்ணீருக்கு வழியே இல்லாத பாலைவனத்தில் நீரூற்றை ஓடச் செய்தான் வல்ல இறைவன். ஜம்ஜம் என்னும் இந்த நீரூற்று மக்கள் குடியேறும் இடமாக சிறிது சிறிதாக மாற உதவி புரிந்தது.

ஆனால் சோதனை மட்டும் முடிந்தபாடில்லை. இப்ராஹீம் (அலை) அவர்களுக்கு மீண்டும் இறைவனிடமிருந்து சோதனை,தன் மகன் இஸ்மாயீல் (அலை) அவர்களை இறைவனுக்காக நரபலி கொடுக்குமாறு கட்டளை. அனைவரும் தயாராகிவிட்டார்கள். ஷைத்தான் எவ்வளவோ இதை தடுக்க முயற்ச்சி எடுத்தும் பயனில்லை. கல்லால் அடிவாங்கியது மட்டுமே மிச்சம்.

வானவரின் தூதர் ஜிப்ரையில் (அலை) அவர்களை அனுப்பி இப்ராஹீம் (அலை) மகனை பலியிடுவதை தடுத்தான் இறைவன். நீ கண்ட கனவை நிறைவேற்றி விட்டாய். எம்முடைய சோதனை அனைத்திலும் வெற்றி அடைந்து விட்டாய் என்று அல்லாஹ் கூறினான். இப்ராஹீம் (அலை) மகனுக்கு பதிலாக ஒரு ஆட்டை அல்லாஹ் பலியிட கட்டளையிட்டான்.

ஆகவே, அவ்விருவரும் (இறைவனின் விருப்பத்திற்கு) முற்றிலும் வழிப்பட்டு, (இப்ராஹீம் தன் மகன் இஸ்மாயீலை அறுத்துப் பலியிட) முகங்குப்புறக் கிடத்தினார்.அச்சமயம் நாம் “இப்ராஹீமே!” என அழைத்து, உண்மையாகவே நீங்கள் உங்களுடைய கனவை மெய்யாக்கி வைத்து விட்டீர்கள் என்றும், நன்மை செய்பவருக்கு நாம் இவ்வாறே கூலி கொடுப்போம்” என்றும் கூறி, “நிச்சயமாக இது மகத்தானதொரு பெரும் சோதனையாகும்” (என்றும் கூறினோம்).ஆகவே, மகத்தானதொரு பலியை அவருக்கு பகரமாக்கினோம்.

-(அல்குர்ஆன் 37:103,104,105,106,107)

மேலும் வல்ல இறைவன் இப்ராஹீம் (அலை) அவர்களை பாராட்டி மக்களின் இமாமாகவும் (தலைவராகவும்) ஆக்கினான்.

இப்ராஹீம் (அலை) அவர்கள் தன் மகன் இஸ்மாயீல் (அலை) அவர்களுடன் சேர்ந்து கஃபாவாகிய உன் அடித்தளத்தை உயர்த்தி

“எங்கள் இறைவனே! எங்களிடமிருந்து (இப்பணியை) ஏற்றுக் கொள்வாயாக; நிச்சயமாக நீயே (யாவற்றையும்) கேட்பவனாகவும் அறிபவனாகவும் இருக்கின்றாய்”

“எங்கள் இறைவனே! எங்கள் இருவரையும் உன்னை முற்றிலும் வழிபடும் முஸ்லிம்களாக்குவாயாக; எங்கள் சந்ததியினரிடமிருந்தும் உன்னை முற்றிலும் வழிபடும் ஒரு கூட்டத்தினரை (முஸ்லிம் சமுதாயத்தை) ஆக்கி வைப்பாயாக; நாங்கள் உன்னை வழிபடும் வழிகளையும் அறிவித்தருள்வாயாக; எங்களை(க் கருணையுடன் நோக்கி எங்கள் பிழைகளை) மன்னிப்பாயாக; நிச்சயமாக நீயே மிக்க மன்னிப்போனும், அளவிலா அன்புடையோனாகவும் இருக்கின்றாய்.”

“இறைவா! இந்தப் பட்டணத்தைப் பாதுகாப்பான இடமாக ஆக்கி வைப்பாயாக! இதில் வசிப்போரில் யார் அல்லாஹ்வையும் இறுதி நாளையும் நம்புகிறார்களோ அவர்களுக்குப் பல வகைக் கனிவர்க்கங்களையும் கொண்டு உணவளிப்பாயாக”

என இறைவனிடம் துஆ மூலம் வேண்டினார்கள்.வேண்டுகோள் இறைவனால் அங்கீகரிக்கப்பட்டது.

(இதையும் எண்ணிப் பாருங்கள்; “கஃபா என்னும்) வீட்டை நாம் மக்கள் ஒதுங்கும் இடமாகவும் இன்னும், பாதுகாப்பான இடமாகவும் ஆக்கினோம்; இப்ராஹீம் நின்ற இடத்தை – மகாமு இப்ராஹீமை – தொழும் இடமாக நீங்கள் ஆக்கிக்கொள்ளுங்கள்” (என்றும் நாம் சொன்னோம்). இன்னும் “என் வீட்டைச் சுற்றி வருபவர்கள், தங்கியிருப்பவர்கள், ருகூஃ செய்பவர்கள், ஸுஜூது செய்பவர்கள் ஆகியோருக்காகத் தூய்மையாக அதனை வைத்திருக்க வேண்டும்” என்று இப்ராஹீமிடமிருந்தும், இஸ்மாயீலிடமிருந்தும் நாம் உறுதி மொழி வாங்கினோம்.

(இன்னும் நினைவு கூறுங்கள்:) இப்ராஹீம்: “இறைவா! இந்தப் பட்டணத்தைப் பாதுகாப்பான இடமாக ஆக்கி வைப்பாயாக! இதில் வசிப்போரில் யார் அல்லாஹ்வையும் இறுதி நாளையும் நம்புகிறார்களோ அவர்களுக்குப் பல வகைக் கனிவர்க்கங்களையும் கொண்டு உணவளிப்பாயாக” என்று கூறினார்; அதற்கு இறைவன் கூறினான்: “(ஆம்;) யார் நம்பிக்கை கொள்ளவில்லையோ அவனுக்கும் சிறிது காலம் சுகானுபவத்தை அளிப்பேன்; பின்னர் அவனை நரக நெருப்பின் வேதனையில் நிர்பந்திப்பேன் – அவன் சேரும் இடம் மிகவும் கெட்டதே.”

-(அல்குர்ஆன் 2:125,126)

இதை பின்வரும் முஹம்மது நபி (ஸல்) அவர்களின் வார்த்தை மேலும் உறுதி படுத்துகின்றன.

“நிச்சயமாக அல்லாஹ் மக்கா நகரை புனித பூமியாக்கியிருக்கிறான். மனிதர்கள் அதைப் புனிதமானதாக ஆக்கவில்லை. அல்லாஹ்வையும் இறுதி நாளையும் நம்பக்கூடிய எவருக்கும் அங்கே இரத்தத்தை ஓட்டுவதும், இங்குள்ள மரங்களை வெட்டுவதும் ஹலால் இல்லை”

காலங்கள் உருண்டோடின உன்னை ஓர் இறை கொள்கைக்காக கட்டிய இப்ராஹீம் (அலை) அவர்கள் இருந்திருந்தால் துடித்து போயிருப்பார். ஆம் ஓர் இறை வழிபாட்டிற்காக கட்டப்பட்ட உன்னுள் பல சிலைகள் கடவுள் என்னும் பெயரால். கொடுமையிலும் கொடுமை யாதெனில் உன்னை வல்ல இறைவனுக்காக கட்டிய இப்ராஹீம் (அலை) அவர்களும் கடவுளின் சிலையாய் மற்ற சிலைகளுடன் நின்றுகொண்டிருந்தார்.

சத்தியத்தை எடுத்துச்சொல்ல ஓர் இறை கொள்கையை நிலைநாட்ட உனது மக்கமா நகரிலேயே உதித்தார் பெருமானார் முஹம்மது நபி (ஸல்) அவர்கள். உண்மையை உறக்க சொன்னதற்காக ஊரைவிட்டே விரட்டப்பட்டார்.சோர்ந்துவிடவில்லை பெரும்படையுடன் நீ இருக்கும் மக்கா நகரை வெற்றியும் கண்டார். உன்னிடத்திலே இருந்த அனைத்து சிலைகளையும் அப்புறப்படுத்தினார்.நீ எதற்காக கட்டப்பட்டாயோ அதனை நிறைவேற்றினார்.

ஆனாலும் அதுவரை முஸ்லிம்கள் உன்னைவிடுத்து பைத்துல் முகத்தஸையே கிப்லாவாக முன்னோக்கி தொழுதுகொண்டிருந்தார்கள். ஆனால் பெருமானார் முஹம்மது நபி (ஸல்) அவர்களுக்கோ உன்னை கிப்லாவின் திசையாக நோக்கி இறைவனை வணங்க ஆசை.முஹம்மது நபி (ஸல்) அவர்களின் ஆசையல்லவா, நிறைவேறாமல் இருக்குமா?

(நபியே!) நாம் உம் முகம் அடிக்கடி வானத்தை நோக்கக் காண்கிறோம்; எனவே நீர் விரும்பும் கிப்லாவின் பக்கம் உம்மைத் திடமாக திருப்பி விடுகிறோம்; ஆகவே நீர் இப்பொழுது (மக்காவின்) மஸ்ஜிதுல் ஹராம் பக்கம் உம் முகத்தைத் திருப்பிக் கொள்ளும். (முஸ்லிம்களே!) இன்னும் நீங்கள் எங்கிருந்தாலும் (தொழுகையின் போது) உங்கள் முகங்களை அந்த (கிப்லாவின்) பக்கமே திருப்பிக் கொள்ளுங்கள்; நிச்சயமாக எவர்கள் வேதம் கொடுக்கப்பட்டிருக்கின்றார்களோ அவர்கள், இது அவர்களுடைய இறைவனிடமிருந்து வந்த உண்மை என்பதை நிச்சயமாக அறிவார்கள்; அல்லாஹ் அவர்கள் செய்வது பற்றிப் பராமுகமாக இல்லை.

-(அல்குர்ஆன் 2:144)

ஆக இந்த மாபெரும் வரலாற்று பயணத்தின் மூலம் இப்ராஹீம் (அலை) அவர்களும் அவர்களின் குடும்பமும் செய்த தியாகம் மற்றும் பெருமானார் முஹம்மது நபி (ஸல்) அவர்களின் ஆசையுமே கஃபாவாகிய உன் சிறப்புக்கு காரணம் என்பதை அறிந்துகொண்டேன்.

“வரலாறு தெரியாத சமுதாயம் நிலைக்காது” என்று சொல்லுவார்கள். இவ்வுலகில நீ இருக்கும்வரை உன்னை நோக்கி மக்கள் வருவது நிற்கும்வரை இஸ்லாமிய வரலாறு அழியாது இஸ்லாமும் அழியாது என்பதை நிச்சயம் நான் அறிவேன்.

உன்னைப்போல சிறப்பு பெறவேண்டும் என எனக்குள்ளும் ஓர் ஆசை. ஆனால் என்னால் நிச்சயம் இப்ராஹீம் (அலை) மற்றும் அவர்கள் குடும்பத்தினர் செய்தது போலெல்லாம் இறைவனுக்காக தியாகம் செய்திடமுடியாது. ஏனெனில் அவர்கள் அல்லாஹ்விற்காக அல்லாஹ்வை நேசித்தார்கள். நானோ சுவர்க்கம் வேண்டும் என்பதற்காகவும் நரகம் வேண்டாம் என்பதற்காகவும் அல்லாஹ்வை நேசிக்கின்றேன்.

ஆகையால் ஹாஜிரா (அலை) அவர்கள் தன்னந்தனியாக பாலைவனத்திலே ஓடியது போல அதே இடத்தில் குளிர்சாதன வசதியுடன் மக்களுடன் மக்களாக கையில் தண்ணீரையும் ஏந்திக்கொண்டு ஹாஜிரா (அலை) ஓடியது போல ஓடி நடிக்கிறேன். இறைவனுக்காக என் பிள்ளையை பழிகொடுக்க மாட்டேன் என தெரிந்தும். யா அல்லாஹ் நீ ஆட்டை குர்பானி கொடுக்க சொன்னாய். இல்லையெனில் நான் என் மகனை உனக்கு குர்பானி கொடுத்திருப்பேன் என்பதாக நடித்து ஆட்டை பழியிடுகிறேன்.மேலும் அதிகம் அதிகம் பெருமானார் முஹம்மது நபி (ஸல்) அவர்கள் மீது ஸலவாத்து ஓதுகின்றேன்.

இப்படியெல்லாம் செய்தாலாவது வல்ல இறைவன் என் துஆவை ஏற்றுக்கொள்ள மாட்டானா என்றும், முஹம்மது நபி (ஸல்) அவர்கள் இந்த பாவியாகிய நானும் சுவனம் செல்லவேண்டும் என ஆசை கொண்டுவிடமாட்டார்களா என்றும் கனா காண்கின்றேன்.

– முஹம்மது சிராஜுத்தீன்

 

பிடரி நரம்பு

1ஒரு சம்பவம் நிகழாமலே வல்ல இறைவனால் உங்களுக்கு துன்பத்தை கொடுக்க இயலும். உங்கள் கை உடைந்து விட்டது வலி. ஆனால் இறைவன் நாடினால் கை உடைந்தால் என்ன வலி ஏற்படுமோ அதே வலியை உங்கள் கையை உடைக்காமலே தர இயலும். இது எப்படி சாத்தியம் ?

நீங்கள் உறங்கும்போது கனவு காணுகிறீர்கள். கனவில் உங்களை பாம்பு தீண்டிவிட்டது. நிஜத்தில் பாம்பு தீண்டினால் என்ன வலி ஏற்படுமோ அதே வலியை அனுபவிப்பீர்கள். கனவு கலைந்து உறக்கத்திலிருந்து எழும்வரை இது நீடிக்கும். விழிப்படைந்த பின் கனவுதானா என உங்கள் மனதை தேற்றிக்கொள்விர்கள்.

உண்மையில் என்ன தான் நடக்கிறது. நீங்கள் ஆபத்தில் இருப்பதை உணர்ந்த உங்களது மூளை வேலை செய்யத்துவங்குகிறது. அது அட்ரினல் சுரப்பியை வெளியிட்டு பிடரி நரம்பு மூலமாக அதை மற்ற பாகங்களுக்கு செலுத்தி இதயத்துடிப்பை அதிகரித்து உங்களது உறக்கத்தை கலைக்கிறது. உங்கள் மூளை இந்த செயலை செய்யத் தவறினால் அல்லது உங்கள் பிடரி நரம்பு அறுபட்டிருந்தால் உங்கள் நிலை ?

இப்பொழுது பின்வரும் இறைவசனத்தை பாருங்கள்.

(நபியே!) உம் இறைவன் மலக்குகளை நோக்கி: “நிச்சயமாக நான் உங்களுடன் இருக்கிறேன்; ஆகவே, நீங்கள் முஃமின்களை உறுதிப்படுத்துங்கள்; நிராகரிப்போரின் இருதயங்களில் நான் திகிலை உண்டாக்கி விடுவேன்; நீங்கள் அவர்கள் பிடரிகளின் மீது வெட்டுங்கள்; அவர்களுடைய விரல் நுனிகளையும் வெட்டி விடுங்கள்” என்று (வஹீ மூலம்) அறிவித்ததை நினைவு கூறும்.

– அல்குர்ஆன் (8:12)

– முஹம்மது சிராஜுத்தீன்

மம்மி

webjazba-61

பண்டைய எகிப்து நாகரிகத்தில் அரசர்கள் இறந்தவுடன் மறுஉலகிற்கு செல்வதாகவும், அவ்வுலகில் வாழ அவர்களுக்கு இவ்வுலக உடல் தேவைபடுவதால், இறந்த அரசர்களின் சடலங்களை பாதுகாப்பது அவசியம் என்ற நம்பிக்கை நிலவி வந்தது. ஆகையால் அரசர்களின் சடலங்கள் பாதுகாக்கப்பட்டன.

உடலிலிருந்து நுரையீரல் (Lungs), கல்லீரல் (Liver), குடல் மற்றும் மூளை ஆகியவற்றை உடம்பிலிருந்து நீக்கிவிடுவார்கள். காரணம் இவை உடலினுள் இருந்தால் மொத்த உடலையும் கெட்டுப்போக செய்துவிடும். இதில் ஆச்சரியமான விஷயம் இதயத்தை மட்டும் அப்படியே விட்டுவிடுவார்கள். ஏனெனில் உடலின் மொத்த இயக்கம், சிந்தனை, ஞாபகம் போன்றவை இதயத்தை சார்ந்தது என்று அவர்கள் நம்பி வந்தனர்.

Untitledஇவையெல்லாம் இதயத்தின் செயல் அல்ல மூளையின் செயல் தான் என்று அவர்களுக்கு தெரிந்திருக்கவில்லை. வெளியே எடுத்த இந்த உறுப்புகளை எல்லாம் (மூளையை தவிர) பத்திரமாக ஒரு ஜாடியில் போட்டு மூடி வைத்துவிடுவார்கள். இதன் பிறகு உடலை, வேதிபொருளான நேட்ரான் (NATRON) எனும் உப்பை தடவி நாற்பது நாட்கள் நன்றாக உலறவைத்துவிடுவார்கள்.

இதன் மூலம் உடல் பாக்டீரியாக்களால் பாதிக்கப்படாமல் பாதுகாக்கப்படும். நாற்பது நாட்களுக்கு பின் உடல் உலர்ந்த திராட்சை போல சுருங்கிவிடும், பிறகு எண்ணையில் நனைத்த துணியால் உடம்பினுள் வைத்து திணிக்கப்படும் (சோளக்காட்டு பொம்மையில வைக்கோல் வைப்போமே அப்படி). பின் நீளமான துணியால் உடலை நன்றாக சுற்றி வைத்துவிடுவார்கள். இதன்பின் உடலை சவப்பெட்டியில் வைத்து மன்னரின் முகம் பதித்த கவசத்தினால் உடல் மூடப்பட்டுவிடும்.

1886 ஜுன் மாதம் எகிப்தில் இடம்பெற்றுள்ள ஒரு பள்ளத்தாக்கில் இத்தகைய மம்மி ஒன்று கண்டுபிடிக்கப்பட்டது.  ஆனால் அந்த உடல் மேலே சொல்லப்பட்ட எந்த பதப்படுத்துதல் முறையும் பின் பற்றப்படாமல் (குடல் ஈரல் இதயம் மூளை வெளியே எடுக்காமல் ) உள்ளது உள்ளபடியே இருந்தது. அது Ramesses II என்ற அரசனான ஃபிர்அவ்னின்  உடல்.

1981-ல் ஃபிரான்ஸிஸ் மித்ரான் ஃபிரான்ஸ் நாட்டின் அதிபரானபோது, உலகின் மிகக்கொடிய கொடுங்கோல் அரசன் என்று கூறப்பட்ட‌ ஃபிர்அவ்னின் சடலத்தை பகுப்பாய்வு செய்வதற்காக தம்மிடம் ஒப்படைக்குமாறு எகிப்திய அரசாங்கத்திடம் வேண்டிக்கொண்டார்.

அந்த உடல் ஆய்வுக்கூடத்திற்கு கொண்டு செல்லப்பட்டு விஞ்ஞானி மாரிஸ் புகைல் (Dr. Maurice Bucaille) தலைமையில் பல்வேறு தொல்லியல் மற்றும் உடற்கூறியல் ஆய்வுகளுக்கு உட்படுத்தப்பட்டது. தொல்பொருள் ஆய்வாளர்கள், சத்திர சிகிச்சை நிபுணர்கள் என ஆரய்ச்சிக்குத் தேவையானவர்கள் அனைவரும் ஆய்வகத்திலே குழுமி, ஃபிர்அவ்ன் எப்படி மரணமடைந்தான் என்பது பற்றிய தகவல்களை கண்டுபிடிப்பதற்காக ஆய்வாளர்கள் பெரும் முயற்சியில் ஈடுபட்டிருந்தனர்.

அப்போது வெளியிடப்பட்ட விஞ்ஞானிகளின் அறிக்கையில் ‘உடலில் உப்பு படிந்திருப்பதானது, ஃபிர்அவ்ன் கடலில் மூழ்கி மரணமடைந்துள்ளமைக்கான சிறந்த சான்றாகும் என்றும் ஃபிர்அவ்ன் உயிர் பிரிந்தவுடன் உடல் மட்டும் ஏதோ ஒரு புதிய முறையில் பதப்படுத்தப்பட்டு பாதுகாக்கப்பட்டிருக்க வேண்டும்’ என்றும் வெளியிட்டனர்.

கடலுக்கடியிலிருந்து வெளியெடுக்கப்பட்டிருந்தாலும் (அதே போன்று கடலிலிருந்து கண்டெடுக்கப்பட்ட) மற்ற உடல்களைவிட இந்த உடல் மட்டும் பழுதடையாமல், எந்த பாதிப்புக்களும் ஏற்படாமல், எவ்வித சிதைவுமில்லாமல் இத்தனை காலம் இருந்தது என்பது குறிப்பிடத்தக்கது.

மேலும், இஸ்ராயீலின் சந்ததியினரை நாம் கடலைக் கடக்க வைத்தோம்; அப்போது, ஃபிர்அவ்னும், அவனுடைய படைகளும், (அளவு கடந்து) கொடுமையும், பகைமையும் கொண்டு அவர்களைப் பின் தொடர்ந்தார்கள்; (அவனை மூழ்கடிக்க வேண்டிய நேரம் நெருங்கி) அவன் மூழ்க ஆரம்பித்ததும் அவன்: இஸ்ராயீலின் சந்ததியினர் எந்த நாயன் மீது ஈமான் கொண்டுள்ளார்களோ, அவனைத் தவிர வேறு இறைவன் இல்லையென்று நானும் ஈமான் கொள்கிறேன்; இன்னும் நான் அவனுக்கே முற்றும் வழிபடுபவர்களில் (முஸ்லிம்களில்) ஒருவனாக இருக்கின்றேன்” என்று கூறினான்.

“இந்த நேரத்தில் தானா (நீ நம்புகிறாய்)? சற்று முன் வரையில் திடனாக நீ மாறு செய்து கொண்டிருந்தாய்; இன்னும், குழப்பம் செய்பவர்களில் ஒருவனாகவும் இருந்தாய்.

எனினும் உனக்குப் பின்னுள்ளவர்களுக்கு ஓர் அத்தாட்சியாக இன்றைய தினம் நாம் உம் உடலைப் பாதுகாப்போம்; நிச்சயமாக மக்களில் பெரும்பாலோர் நம் அத்தாட்சிகளைப்பற்றி அலட்சியமாக இருக்கின்றார்கள்” (என்று அவனிடம் கூறப்பட்டது).

– அல்குர்ஆன் (10:90,91,92)

ஃபிர்அவ்னின் இந்த உடல் எகிப்து அருங்காட்சியகத்தில் காட்சிக்கு வைக்கப்பட்டுள்ளது.

மேலும் இந்த ஆராய்ச்சியை தலைமையேற்று நடத்திய மாரிஸ் புகைல் (Dr. Maurice Bucaille) இதன் காரணமாக இஸ்லாத்தையும் ஏற்றார்.

மேலும் அவர் தனது புத்தகத்தில் பின்வருமாறு குறிப்பிடுகிறார்.

“நான் எகிப்தின் அருங்காட்சியகத்தில் மம்மிகள் வைக்கப்பட்டிருந்த இடத்தை கவனித்துக் கொண்டிருந்தேன். அங்கு வரும் ஏராளமான சுற்றுலா பயணிகள் ‘ஆஹா… என்ன ஒரு விந்தை இது! காலத்தை கடந்த மனிதர்களை காண்பது எப்படி ஒரு பிரமிப்பை தருகிறது..’ என்று விழிகள் விரிய முனுமுனுத்தபடி நகர்ந்து சென்றனர்.

என்னே ஒரு துரதிஷ்டம்..! பாடம் செய்யப்பட்ட அந்த உடல் பறைசாற்றும் பாடத்தை, இறைவனையும் அவன் தூதரையும் நிராகரிப்பவர்களுக்கு உறைந்த சாட்சியாய், அத்தாட்சியாய் அந்த உடலை நூற்றாண்டுகளாய் இறைவன் பாதுகாப்பதை அறியாதவர்களாய்……!”

– முஹம்மது சிராஜுத்தீன்

துபாய் விசா

American Visaமகிழ்ச்சியுடன் சென்னை செல்ல ஏற்பாடு செய்தான் முஹம்மது. தனது தந்தை துபாயிலிருந்து வருகிறார் என்பதற்காக அல்ல. மாறாக அவர் அக்காள் கணவர் மேளாலராக பணிபுரியும் நிறுவனத்தில் வேலைக்கான விசாவுடன் தந்தை வருகிறார் என்பதற்கே.

தந்தை உடல்நிலை சரியில்லாமல் வேலையை விட்டுவிட்டு வருகிறார் என்கிற கவலையெல்லாம் அவனுக்கு இல்லை. மேற்படிப்பை முடித்துவிட்டு ஒரு வருடகாலம் வெட்டியாக சென்றாகிவிட்டது. என்ன செய்கிறாய் ?  என கேட்கும் உறவுகளுக்கெல்லாம் விசாவுக்காக காத்திருக்கிறேன் என்று சொல்லி சொல்லி அலுத்துவிட்டது.

சென்னை விமானநிலையத்தில் தந்தையை வரவேற்றான்.அவரோ நடக்ககூட இயலாமல் வண்டியில் வந்தார். இவனுக்கு அவருடைய உடல்நலம் பற்றி விசாரிக்க கூட தோன்றவில்லை. விசா எடுத்து வந்தீர்களா? ஓரு சில நாட்களில் விசா எடுத்து அனுப்புவதாக அக்கா வாக்குறுதி கொடுத்திருப்பதாக சொன்னார்.

இவனுக்கோ அதிர்ச்சி ஒரு சில நாள் என சொல்லி ஒரு வருடம் ஓடிவிட்டது. இன்னும் காத்திருப்பா? நினைக்க நினைக்க கவலை மனதை தொற்றிக்கொண்டது. ஏதேதோ எண்ணங்கள் உதிக்கத் துவங்கிவிட்டன. உண்மையில் அக்காள் மாப்பிள்ளைக்கு வேலை வாங்கித்தர விருப்பம் தானா? இல்லை அவரிடம் கேட்காமலே அக்கா வாக்குறுதி கொடுத்துவிட்டார்களா?

எதிர்காலம் சூன்யமாய் ஆகிவிடுமோ என்ற கவலையில் ஜும்மா தொழுக பள்ளிக்குள் நுழைந்தான். வழக்கமான சொற்பொழிவு, அதிகம் செவியுற்ற இறைவசனம் தான், ஆனால் இன்று இவனுக்காக அருளப்பெற்றது போல் உணர்ந்தான்.

“எந்த ஒரு சமூதாயத்தவரும், தம் நிலையயைத் தாமே மாற்றிக் கொள்ளாத வரையில், அல்லாஹ் அவர்களை நிச்சயமாக மாற்றுவதில்லை;”

அன்று இரவே சென்னை புறப்பட்டான் விமான நிலையத்திற்கு உறவினரை வரவேற்க அல்ல மாறாக வேலை தேடி. ஓரிரு மாத சிரமத்திற்கு பின் வேலையும் கிடைத்தது. பெரிய நிறுவனத்தில் விற்பனை பிரதிநிதியாக, மாதம் ரூ.15000 சம்பளம். பிற நிறுவனங்களை சந்தித்து இவர்களது மோட்டாரை விற்க வேண்டும். பொறியியல் படிக்காத இவனுக்கு ஆரம்பத்தில் சற்று சிரமமாக இருந்தாலும் சில நாட்களில் கற்றுக்கொண்டான். துபாய் விசா முற்றிலும் மறந்தே போனது. ஆனால் உறவினர்கள் விடுவதாய் இல்லை. இங்கே இவ்வளவு சம்பாதிக்கிறாயே நீ துபாய் சென்றால் இன்னும் அதிகம் சம்பாதிக்கலாம் அல்லவா?

ஒரு வருட வேலைக்குப்பின் எவருக்கோ பொருளை விற்று இலாபம் பெற்றுத்தரும் நாம் ஏன் சுயமாக தொழில் செய்யக்கூடாது என சிந்திக்க ஆரம்பித்தான். அதற்கான திட்டங்களையும் தீட்டினான். சிறுக சிறுக தேவையான பணத்தையும் சேர்த்து செயல்படுத்த முடிவெடுக்க மேலும் ஒரு வருடம் ஓடிப்போனது. தனது சுயதொழில் கனவை சுமந்துகொண்டு தந்தையை சந்திக்க செல்ல ஆயத்தமானான். அப்பொழுது தனது தந்தை வேறொரு அதிர்ச்சி தகவலை சொல்ல காத்திருக்கிறார் என்பது இவனுக்கு தெரிந்திருக்க வாய்ப்பில்லை.

மகிழ்ச்சியுடன் வீட்டினுள் நுழைந்த இவனிடத்தில் தந்தை ஒரு காகிதத்தை நீட்டினார். ஆம் இவன் பல காலம் எதிர்பார்த்து காத்திருந்த துபாய் விசா.மாதம் ரூ.40000 சம்பளம். ஆனால் இப்பொழுது ஒரு துளி கூட மகிழ்ச்சி இல்லை மாறாக துக்கம் தொண்டையை அடைத்தது. தனது சுயதொழில் கனவு கனவாகவே ஆகிவிட்டது போல் உணர்ந்தான். சோகமாய் அமர்ந்திருந்த இவனிடத்தில் காலண்டரை நீட்டிய தந்தை இன்னும் பத்து நாட்களுக்குள் புறப்பட வேண்டும் என்றார். வெறுப்புடன் காலண்டரை வாங்கிய இவனது கண்ணில் தென்பட்டது அந்த நபிமொழி.

“வியாபாரத்தில் பரக்கத் (அருள்வளம்) இருக்கிறது.”

– முஹம்மது சிராஜுத்தீன்