உமர் (ரலி)

“முஹம்மதை கொல்லாமல் விடமாட்டேன்” என்று புறப்பட்டார் உமர்.

imL_b2Jfஉமருக்கு அப்போது இருபத்தியாறு வயது. முரடு என்றால் அப்படியொரு முரட்டு சுபாவம் கொண்ட இளைஞர். மிகத் தீவிரமான உருவ வழிபாட்டாளர். ஒரு சந்தர்ப்பம் கிடைத்தால் முஹம்மது நபி (ஸல்) அவர்களையும் அவரது தோழர்களையும் ஏதாவது செய்து விடமாட்டோமா என்று பலநாட்களாக காத்துக் கிடந்தவர். அபூஜஹல் வாயிலாக அப்படியொரு வாய்ப்பு வந்தபோது, மிகவும் மகிழ்ச்சியுடன் ஏற்றுக்கொண்டு ஒரு பெரிய வாளை தூக்கிக்கொண்டு உடனே கிளம்பிவிட்டார்.

உமரின் கோபம், உருவமற்ற இறைவனை முஹம்மது நபி (ஸல்) அவர்கள் முன்னிறுத்தியதனால் மட்டுமல்ல. ஒரே கூட்டுப் பறவைகளாக இருந்த மக்கா நகரின் மக்களிடையே இன்று இரு பிரிவுகள் தோன்றிவிட்டதற்கு அவர்தானே காரணம் என்கிற உணர்ச்சிவயப்பட்ட மனநிலை. அதனால், முஹம்மது நபி (ஸல்) அவர்களை கொன்றுவிட்டால் எல்லா பிரச்னைகளுக்கும் தீர்வு கிடைத்துவிடும் என்று நம்பினார். தவிரவும் இஸ்லாம் ஒன்றும் மிகத் தீவிரமாகப் பரவி ஏராளமானவர்களை இன்னும் கவர்ந்திருக்கவில்லை. அங்கொன்றும் இங்கொன்றுமாகத்தான் மதம் மாறிக்கொண்டிருந்தார்கள் ? முஹம்மது நபி (ஸல்) அவர்களை கொன்றுவிட்டால் மதம் மாறுவதும் நின்றுவிடும்; மாறியவர்களையும் மீண்டும் மாற்றிவிடலாம்.இவ்வாறு எண்ணியபடி முஹம்மது நபி (ஸல்) அவர்களை தேடி ஆக்ரோஷத்துடன் புறப்பட்டுப் போனார் உமர்.

போகிற வழியில் உமரைத் தடுத்து நிறுத்தி, “எங்கே இத்தனை ஆக்ரோஷமாகக் கிளம்பிவிட்டீர்கள்?” என்று கேட்டார் அவரது நண்பர் நுஐம் பின் அப்துல்லா. இவர் இஸ்லாத்தை ஏற்றுக் கொண்டதை உமர் அறிந்திருக்கவில்லை. “முஹம்மதை கொன்று விட்டு  கபாவில் உள்ள நமது கடவுள்களுக்கு ஏற்பட்ட அவமானத்தைத் துடைக்கப் போகின்றேன்” என்றார் உமர்.

நுஐமுக்குக் கவலை வந்துவிட்டது. என்ன செய்து இந்த முரட்டு உமரைத் தடுத்து நிறுத்துவது ? கையில் கொலை வாளுடன் போய்க்கொண்டிருக்கிறார். முஹம்ம்மது நபி (ஸல்) அவர்களும் அவரது தோழர்களும் திண்ணையில் அமர்ந்து பேசிக்கொண்டிருப்பார்கள். அவர்களிடம் ஆயுதம் ஏதும் இருக்காது. தற்காப்புக்காக கூட ஏதும் செய்துகொள்ள முடியாது. இங்கேயே இவரைத் தடுக்காவிட்டால் விபரீதம் நடப்பது உறுதி என்று அஞ்சியவர்,

“முஹம்மதை கொல்வது இருக்கட்டும்; உன் வீட்டிலேயே முஸ்லிம்களை வைத்துக்கொண்டு நீ முஹம்மதை நோக்கிப் போவதைப் பார்த்தால் யாராவது சிரிக்கமாட்டார்களா ?” என்று கேட்டார்.

உமரின் சகோதரியும் அவளது கணவரும் முஸ்லிமாக மாறிவிட்டார்கள் என்கிற உண்மையை (அன்றுவரை உமருக்கு அந்த விஷயம் தெரியாது.) முதல்முதலாக உமரிடம் சொல்லிவிட்டார்.அதனாலென்ன ? முதலில் என் வீட்டுக் களையை  பிடுங்கிவிட்டுப பிறகு முஹம்மதிடம் போகிறேன் என்று சொல்லிவிட்டு உமர் நேரே தன் சகோதரியின் வீட்டுக்கு ஓடத் தொடங்கினார்.

தம் சகோதரி பாத்திமாவின் வீட்டருகே உமர் சென்றபோது உள்ளே யாரோ ஓதிக்கொண்டிருக்கும் குரல் கேட்டது. சந்தேகமே இல்லை. நுஐம் சரியாகத்தான் சொல்லியிருக்கிறார் என்று கோபம் தலைக்கேறி, உருவிய வாளுடன் கதவை உடைத்துத் திறந்து உள்ளே பாய்ந்தார் உமர். உமரைக் கண்டதும் பாத்திமா, தாம் வைத்து ஓதிக்கொண்டிருந்த குர் ஆனின் பிரதியைத் தன் உடைக்குள் மறைக்கப்பார்த்தார். அவளது கணவனோ, தங்களை விட்டுவிடும்படி மன்றாடத் தொடங்கினார். ஆனால் உமர் விடவில்லை. தன் சகோதரியை அடித்து ரத்தக்காயப் படுத்திவிட்டு, மைத்துனரின் மீது பாய்ந்தார். இருவரும் கட்டிப் புரண்டார்கள். அடித்துக் கொண்டு எழப்பார்த்தார்கள்.

ஆனால் அல்லாஹ்வின் நாட்டமோ வேறாக இருந்தது.

சகோதரி காயம் பட்டு விழுந்ததும் சிறிதே சலனம் ஏற்பட்டது. சட்டென்று தாக்குதலை நிறுத்திவிட்டு, “நீங்கள் வைத்து ஓதிக்கொண்டிருந்ததைக் கொண்டுவாருங்கள். அப்படி என்னதான் அதில் இருக்கிறது என்று பார்க்கிறேன்.”

தயக்கத்துடன் பாத்திமா எடுத்துவந்து கொடுத்த குர்ஆனின் அந்தச் சில பகுதிகளை வாசித்துப் பார்த்த உமர் தம்மையறியாமல் வாளைக் கீழே போட்டார்.  பிரமிப்பும் அச்சமும் கொண்டு அதுவரை இல்லாத கனிவும் அன்பும் மேலோங்கியவராக கண்கள் கலங்கி நின்றார்.

“இதென்ன! இந்த வசனங்கள் இத்தனை அழகும் சிறப்பும் கொண்டவையாக இருக்கின்றன! நிச்சயம் மனிதர் உருவாக்கியதாக இருக்கமுடியாது. என்றால், இது இறைவனின் வசனங்கள்தாம் என்று தோன்றுகிறது” என்று பேசத் தொடங்கியவர், சில வினாடிகளில் “முஹம்மது ஓர் இறைத்தூதர்தான் என்பதை நான் ஒப்புக்கொள்கிறேன். இதோ, இப்போதே போய் அவரைச் சந்தித்து இதனை உரக்கச் சொல்லுகிறேன்” என்று அலறிக்கொண்டு ஓடத் தொடங்கிவிட்டார். முஹம்மது நபி (ஸல்) அவர்களை சந்தித்து இஸ்லாத்தையும் ஏற்றுக்கொண்டார்.

காலங்கள் உருண்டோடின மதீனாவிற்கு ஹிஜ்ரத் சென்ற முஹம்மது நபி (ஸல்) அவர்கள் மக்காவையும் வெற்றி கண்டார்கள்.

ஹிஜ்ரி 11, ரபீஉல் அவ்வல் பிறை 12, திங்கட்கிழமை முற்பகல் முடியும் நேரத்தில் முஹம்மது நபி (ஸல்) அவர்கள் இவ்வுலகை பிரிந்தார்கள். நபி (ஸல்) அவர்களின் மரணச் செய்தி எங்கும் பரவியது. மதீனா இருண்டுபோனது.

உமர் அறிவில் சிறந்தவர் தான். “உமரின் நாவில் அல்லாஹ் பேசுகிறான்” என முஹம்மது நபி (ஸல்) அவர்களால் சிறப்பித்து சொல்லப்பட்டவர் தான். ஆனால் முஹம்மது நபி (ஸல்) அவர்கள் மீது கொண்ட அன்பு அவரை இப்படி சொல்ல வைத்தது.

“முஹம்மது மரணித்துவிட்டார் என சொல்பவர்களை வெட்டுவேன்…”

– முஹம்மது சிராஜுத்தீன்

வஹ்ஷீ

eediபத்ருப்போர் – வெறும் 313 நபர்களே கொண்ட முஸ்லிம்களின் படை 1000 நபர்களுக்கு மேலுள்ள குறைஷிகளை எதிர்கொள்ள வேண்டியிருந்தது. அதில் பங்கெடுத்த முக்கியமான ஸஹாபிகளில் ஒருவர் ஹம்ஸா (ரலி) அவர்கள். நபியவர்களின் சிறிய தந்தை. முஹம்மது நபி (ஸல்) அவர்களுக்கு நபித்துவம் கிடைத்த ஆரம்பகட்டத்தில் இஸ்லாத்தை ஏற்றுக் கொண்டோரில் இவரும் ஒருவர்.

அல்லாஹ்வின் உதவியால் முஸ்லிம்கள் குறைஷிகளை வென்றார்கள். இப்போரில் இணைவைப்பாளர்களில் முக்கியமானோர்களாகிய அபூஜஹ்ல், ஸைபா, வலீத், உத்பா கொலை செய்யப்பட்டனர். தனது தந்தை உத்பாவின் மரணத்தை கண்ணுற்ற ஹிந்தா கோபத்துடன் சபதமிட்டாள் “என் தந்தையை கொன்ற ஹம்ஸாவை கொன்று ஈரலைப் பிடுங்கி பற்களால் கடித்து துப்புவேன்”.

தன் சபதத்தை நிறைவேற்றுவதற்காக குறி பார்த்து ஈட்டி எறிவதில் தேர்ந்த வஹ்ஷீ என்னும் அடிமையை தேர்ந்தெடுத்தாள். முஸ்லிம்களை பழிவாங்க துவங்கப்பட்டது மற்றோரு போர். உஹது போர். இந்தப் போரில் வஹ்ஷீ எந்தவொரு முக்கியமான செயலிலும் ஈடுபடவில்லை. ஒரே ஓர் இலக்கு. அதை அடைந்தால் தனக்கு விடுதலை. அந்த எண்ணம் மட்டுமே நெஞ்சம், தலை, கை கால் என்று உடல் முழுக்க வியாபித்திருந்தது. எனவே படையினர் மற்றவருடன் கலந்துகொள்வதோ, அந்த ஆரவாரத்தில் பங்கெடுப்பதோ இல்லாமல் அமைதியாய் மதீனாவின் பாதையை நோக்கி கண்கள் நிலைகுத்தின.

யுத்தம் துவங்கியது; உக்கிரம் அடைந்தது. புதர்களுக்கும் பாறைகளுக்கும் இடையில் மறைந்து மறைந்து ஹம்ஸாவைத் தொடர்ந்து நெருங்கி ஈட்டி குறிபார்த்து வஹ்ஸியால் எறியப்பட்டது. அது நேராக ஹம்ஸா (ரலி) அவர்களின் அடிவயிற்றில் புகுந்து அதன் முறுமுனை இடுப்பிலிருந்து வெளிவந்தது. திகைத்துத் திரும்பிய ஹம்ஸா (ரலி)வஹ்ஷியை நோக்கித் தள்ளாடி கால்களை முன்னெடுத்து வைத்து, அதற்குமேல் முடியாமல் செருகிய ஈட்டியுடன் தடுமாறி வீழ்ந்து மரணமடைந்தார்.

மரணமடைந்த ஹம்ஸா (ரலி) அவர்களின் உடலை சின்னாபின்னப் படுத்தி தான் சபதமிட்டது போலவே  ஈரலை அறுத்து எடுத்து அதைக் கடித்து துப்பினாள்.

தமது சிறிய தந்தையின் மரணமும் அவரது உடலுக்கு இழைக்கப்பட்ட கொடூரமும் முஹம்மது நபி (ஸல்) அவர்களுக்கு சொல்லிலடங்கா சோகத்தை அளித்தது.  ஆனால் இறைவனின் நாட்டம் வேறாக இருந்தது. மக்கா வெற்றி பெற்ற பிறகு ஹிந்தா மற்றும் வஹ்ஷீ இருவரும் இஸ்லாத்தை ஏற்றனர்.

நபி(ஸல்) அவர்கள் இறந்துவிட்டபோது, (தன்னை ஒரு நபி என்று வாதிட்ட வண்ணம்) பொய்யன் முஸைலிமா கிளம்பினான். (அவன் நபித்தோழர்களிடம் போரிடுவதற்காகப் பெரும்படை ஒன்றைத் திரட்டலானான். அவனை முறியடிப்பதற்காக அபூபக்கர் சித்தீக் (ரலி) அவர்களும் படை திரட்டி அதற்கு காலித் இப்னு வலீத் (ரலி) அவர்களைத் தளபதியாக நியமித்தார்கள்) வஹ்ஷீ தனக்குள் கூறிக்கொண்டார், ‘நிச்சயம் நான் முஸைலிமாவை நோக்கிப் புறப்பட்டுச் செல்வேன். அவனை நான் கொல்ல (வாய்ப்புக் கிடைக்க)லாம். அதன் மூலம், (முன்பு) நான் ஹம்ஸா(ரலி) அவர்களைக் கொன்றதற்கு(ப் பிரயாசித்தம் தேடி) ஈடுசெய்யலாம்”

அப்(போரின்)போது ஒரு மனிதன் ஒரு சுவரின் இடைவெளியில் நின்றிருந்தான். அவன் தலைவிரி கோலத்துடன் (போரின் புழுதி படிந்து) சாம்பல் நிற ஒட்டகம் போன்றிருந்தான். அவன் மீது (ஹம்ஸா அவர்களைக் கொலை செய்த அதே) ஈட்டியை எறிந்தார் வஹ்ஷீ. அது அவனது இரண்டு மார்புக்கு நடுவே பாய்ந்தது. அது அவனுடைய பின் தோள்களுக்கிடையிலிருந்து வெளியேறியது. அவனை நோக்கி அன்சாரிகளில் ஒருவர் ஓடி வந்தார். தம் வாளால் அவனுடைய உச்சந்தலை மீது ஓங்கி வெட்டிவிட்டார் (அவன்தான் முஸைலிமா) .

(முஸைலிமா கொல்லப்பட்ட போது) ஒரு சிறுமி வீட்டின் முகட்டிலிருந்து கொண்டு, ‘அந்தோ! நம்பிக்கையாளர்களின் தலைவரை ஒரு கறுப்பு அடிமை (வஹ்ஷீ) கொலை செய்துவிட்டான்’ என்று (உரக்கச் சப்தமிட்டுச்) சொன்னாள்.

– முஹம்மது சிராஜுத்தீன்

வெளிநாட்டு வாழ்க்கை

2சமீர் – நாகை மாவட்டத்தை சேர்ந்த சராசரி முஸ்லிம் இளைஞன். கேட்டரிங் முடித்துவிட்டு துபாயில் வேலை. சுமாரான சம்பளம். இவனது சம்பளத்தை வைத்து ஊரில் குடும்பம் நல்லபடியாக சென்றுகொண்டிருந்தது. திருமணம் முடிந்து ஐந்து வருடம் கடந்திருந்தது. திருமணம் என்னவோ பெற்றோர் பெண் பார்க்க தான் நடந்தது. ஆனால் காதலித்திருந்தால் கூட இதுபோல மனைவி அமைந்திருக்குமா என அடிக்கடி அவன் நினைப்பதுண்டு. இவர்களின் காதலுக்கு சாட்சியாக ஒரு அழகிய பெண் குழந்தையும் பிறந்தது.

வழக்கம் போல் அதிகாலை இவன் வேலைக்கு தயாராகிக்கொண்டிருந்தான். ஊரிலிருந்து தொலைபேசி அழைப்பு, ஊரிலிருந்து தொலைபேசி அழைப்பு வருகிற நேரமில்லை இது. உடல்நிலை சரியில்லாத தன் தந்தைக்குத்தான் எதுவும் பிரச்சனையோ என தொலைபேசி அழைப்பை எடுத்தான். ஆனால் செய்தி அதைவிட அதிர்ச்சியாய் தாக்கியது. ஆம் வாழ்நாளில் இவன் ஒரு நாளும் எதிர்பார்த்திடாத செய்தி.

மறுமுனையில் தாய் அழுதவாறே கதறினால் “உன் பொண்டாட்டி உனக்கு மோசம் பண்ணிடாடா”.

மருத்துவரை பார்த்துவிட்டு சென்னையிலிருந்து விடிகாலை திரும்பி வந்த பெற்றோர் தனது மருமகள் வீட்டு கார் டிரைவருடன் தனியாக இருந்ததாய் சொன்னார்கள். இவனுக்கு செய்தி  வருவதற்கு முன்பாக இவன் பெற்றோர் செய்த கலேபரத்தில் ஊருக்கெல்லாம் தெரிந்து தொலைபேசி மூலம் துபாயில் வசிக்கும் இவனது நன்பர்கள் மற்றும் ஊர்காரர்களுக்கும் தெரிந்துவிட்டது.

இன்னும் அதிர்ச்சியிலிருந்து மீளாத நிலையில் தொலைபேசி அழைப்பு குவிய ஆரம்பித்தது. ஆறுதல் சொல்லி சில, ஆறுதல் சொல்வதாய் வெறுப்பேற்றின சில. பேசுபவர்கள் அனைவரும் மறக்காமல் இவனது மனைவியை வசைமாரி பொழிந்து தள்ளினர்.

“நாம் இப்படி நாய் படாதபாடுபட்டு குடும்பத்தை விட்டு சம்பாதித்து அனுப்பினால் இப்படி அறிப்பெடுத்து அலைகிறாள்கள்” என ஒட்டுமொத்தமாய் பெண் இணத்தையே வசைமாறி பொழிந்தார்கள் சக நண்பர்கள். மொத்தத்தில் இவை அனைத்தும் இவனுக்கு மனைவியின் மீது தீராத கோபத்தையே ஏற்படுத்தின.

கோபத்தின் உச்சியிலிருந்த அவனுக்கு தொலைபேசியில் தனது மனைவியை அழைத்து தலாக் சொல்லிவிடலாமா என தோன்றிற்று. இல்லை ஒழுக்கம் கெட்டவளோடு பேச வேண்டிய அவசியமில்லை என்று முடிவெடுத்து கடிதம் எழுதினான் “தலாக் தலாக் தலாக்”.

நண்பர்கள் மூலம் அலுவலகத்திற்கு விடுப்பு சொல்லிவிட்டு தனியாய் நடக்க ஆரம்பித்தான் கடற்கரை நோக்கி. கடற்கரையில் அமர்ந்த அவனுக்கு பழைய நினைவுகள் ஒவ்வொன்றாய் வர ஆரம்பித்தன.

திருமணம் முடிந்து சரியாய் ஒரு மாதம் கழித்து துபாய் கிளம்பிவிட்டான். மனைவிக்கு இவனை பிரிய மனமே இல்லை. ஆனால் சம்பாதிக்க சென்றாக வேண்டுமே. இரு வருடம் கழித்து மீண்டும் ஒரு மாதம் மனைவியுடன். ஆறு மாதம் கழித்து மனைவி கற்பமாய் இருப்பதாய் சொன்னாள். எப்படியாவது பிரசவத்திற்கு வந்துவிடுங்கள் என்றவளுக்கு பிள்ளைக்கு பெயர் அனுப்பிவைத்தான். மூன்று வருடங்கள் ஓடிவிட்டன இதுவரை பெற்ற பிள்ளையைக் கூட நேரில் பார்த்ததில்லை.

கார் வாங்கிய புதிதில் நான் கார் ஓட்ட கத்துக்கொள்கிறேன் என கேட்டாள். ஒத்துக்கொள்ளாமல் இவன் தான் டிரைவரை சம்பளத்திற்கு அமர்த்தினான். இன்று அந்த டிரைவராலேயே வந்தது பிரச்சனை. கோபம் சற்று குறையத் துவங்கியது. சிந்திக்க ஆரம்பித்தான். இது நாள் வரை பணத்திற்காக வாழ்க்கையை அல்லவா தொலைத்து நிற்கிறோம் என தோன்றியது. கிலாபத் ஆட்சியில் சிறை கைதிகள் கூட நாம் மனைவியை பிரிந்தது போன்று இத்தனை நாட்கள் பிரிந்ததில்லையே ? மனைவி தவறு செய்தாலா அல்ல நாம் தவறு செய்ய வைத்தோமா என எண்ணத் துவங்கினான். தீர்க்கமான முடிவுடன் புறப்பட்டான்.

முதலில் அந்த தலாக் கடிதத்தை கிழித்துவிட்டு வேலையை விடுவதாய் அறிவித்துவிட்டு இந்தியா பயணமானான். நேராக மாமியார் வீட்டிற்கு சென்று மனைவியை சந்தித்தான். மனைவி அழுது கொண்டிருந்தாள் ஆனால் மனைவியின் பெற்றோறோ அபாண்டமாக பழி சுமத்திவிட்டார்கள் என இவனது தாயை திட்டினார்கள். பெற்ற பிள்ளையோ அருகில் வர பயந்தது.

மனைவியை தனியாக அழைத்து விசாரித்தான். மனைவி அழுதவாறே தவறு செய்ததை ஒப்புக்கொண்டாள். மன்னிப்பும் கேட்டாள். இனி இப்படி நடக்காது என வாக்குறுதி கொடுத்தாள். இனி இப்படி நடக்க விடமாட்டேன் என சொல்லியவாறு மனைவியுடன் புறப்பட்டான்.

பெற்றோரை சமாதானப் படுத்தினாலும் ஊர் வாயை மூட முடியாது என உணர்ந்து மனைவியுடன் சென்னை புறப்பட்டு சேர்த்து வைத்த பணத்தில் சிறியதாய் ஒரு உணவகம் ஆரம்பித்து தனது புது வாழ்க்கையை துவங்கினான்.

– முஹம்மது சிராஜுத்தீன்

 

மூஸா (அலை)

1அல்லாஹ் மூஸா (அலை) அவர்களிடத்தில் அவர்கள் கையில் வைத்திருக்கும் தடியைப்பற்றி கேட்டான். அவர்கள் சாதாரணமாக தடி என்று சொல்லியிருந்தால் பரவாயில்லை. அவர்கள் இதை நான் ஊன்றுகோளாய் பயன்படுத்துகிறேன். இதை வைத்து இலை தளைகளை பறிக்கின்றேன் என்று அடுக்கிக் கொண்டே போனார்கள்.

பெருமைக்கு சொந்தக்காரனிடமே பெருமை கொள்ளமுடியுமா ?

அந்த கைத்தடியை கீழேபோட சொல்லி உத்தரவு. கீழே போட்டவுடன் அது பாம்பாக மாறியது. பயந்து நடுங்கியபடி இறைவா என்னை மன்னித்துவிடு அது ஒரு சாதாரண கைத்தடி ஆனால் நீ நாடினால் அது உன் நாட்டப்படி மாறிவிடுகிறது.

இறுதியில் அப்படித்தான் ஆனது. ஒரே கடல் மூஸா (அலை) அவர்களுக்கு வழிவிட்டு அவர்களை காப்பாற்றி ஃபிர்அவ்னை மூழ்கடித்தது.

இன்னும்: “நீர் என் அடியார்களுடன் இரவோடிரவாகப் பயணம் செய்து, அவர்களுக்காக கடலில் உலர்ந்த பாதையை உண்டாக்கிக் கொள்வீராக! (ஃபிர்அவ்ன் உம்மைப்) பிடித்துவிடுவான் என்று பயப்படாமலும், (கடலில் மூழ்கி விடுவோம் என்று) அஞ்சாமலும் இருப்பீராக!” என்று மூஸாவுக்கு நாம் திட்டமாக வஹீ அறிவித்தோம்.

-அல்குர்ஆன்  (20:77)

மேலும் ஃபிர்அவ்ன் தன் சேனைகளுடன் அவர்களைப் பின் தொடர்ந்தான்; ஆனால் கடல் அவர்களை முற்றாக மூழ்கடித்து விட்டது.

-அல்குர்ஆன்  (20:78)

அதுபோல மழையோ வெயிலோ அது நன்மையை தருமா அல்லது தீமையை தருமா என்பது அல்லாஹ்வின் நாட்டமே. அவன் நம் அனைவருக்கும் நல்லதையே நாடுவானாக. ஆமீன்.

– முஹம்மது சிராஜுத்தீன்

அல்லாஹ் நாடினால் …

insha_allahகுறைஷிகளுக்கு முஹம்மது நபி (ஸல்) அவர்கள் மீது நல்ல அபிப்பிராயமே இருந்தது. ஆனால் அவர்கள் இஸ்லாத்தை ஏற்க மட்டும் விரும்பவில்லை. அதற்கு காரணமும் இருந்தது. ஏனெனில் குறைஷிகளின் முக்கிய வருமானம் கஃபாவிற்கு வரும் யாத்ரீகர் கூட்டத்தை நம்பியே இருந்தது. ஆனால் முஹம்மதோ கஃபாவில் இருக்கும் அனைத்து சிலைகளையும் அப்புறப்படுத்த வேண்டும் என்கிறார். பிறகு கஃபாவிற்கு எப்படி கூட்டம் வரும், மேலும் தமது வருமானமும் தடை பட்டுவிடுமே என்கிற அச்சம் உச்சத்தில் இருந்தது. ஆகவே அவர்கள் முஹம்மது நபி (ஸல்) அவர்களை பொய்யர் என் நிரூபிக்க முடிவு செய்தார்கள்.

யூத மத குருமார்களான ரபிக்களின் உதவியை நாடினார்கள். முஹம்மது நபி (ஸல்) அவர்களை பரிசோதிக்க மூன்று வினாக்களை அவரிடம் கேட்கச் சொல்லி குறைஷிகளிடம் சொல்லி அனுப்பினார்கள்.”இதுதான் பரீட்சை. இந்த மூன்று கேள்விகளுக்கும் அந்த முஹம்மது என்ன பதில் தருகிறார் என்று கேட்டு வந்து சொல்லுங்கள். அவர் சொல்லும் பதில்கள் சரியானவையாக இருக்குமானால், சந்தேகத்துக்கு இடமில்லாமல் அவர் இறைத்தூதர்தான் என்று நீங்கள் நம்பலாம். பதில்கள் சரியில்லை என்றால், அவர் பித்தலாட்டக்காரர்தான் என்பதில் சந்தேகமில்லை” என்று சொன்னார்கள்.

  • ஆதிகாலத்தில் தமது சமூகத்தினரை விட்டுத் தனியே பிரிந்துபோன இளைஞர்கள் யார்?அவர்களின் பின்னணி என்ன?
  • கிழக்கு, மேற்கு திசையெங்கும் பயணம் செய்து இரு எல்லைகளையும் தொட்ட பயணி யார்? அவரது சிறப்பு என்ன?
  • ஆன்மா என்பது என்ன?

முதல் இரு வினாக்களுமே சரித்திரம் தொடர்பானவை. அப்புறம், இருக்கவே இருக்கிறது ஆன்மா. இன்றைக்கு வரை அது என்ன என்கிற வினாவும், அதற்கான விடைதேடும் ஞானியரும் இருக்கவே செய்கிறார்கள்.

தம்முன் வைக்கப்பட்ட வினாக்களுக்கு மறுநாள் விடை சொல்லுவதாகச் சொல்லி, வந்தவர்களை அனுப்பிவைத்தார்கள் முஹம்மது நபி (ஸல்) அவர்கள். விபரீதம் இங்கேதான் வந்தது. அதெப்படி அத்தனை உத்தரவாதமாக, மறுநாள் விடை தருவதாகச் சொல்லிவிடமுடியும் ?

அடுத்த பதினைந்து நாட்களுக்கு ஜிப்ரீல் (அலை) அவர்கள் வரவேயில்லை. கேள்வி கேட்ட குறைஷிகள் கைகொட்டிச் சிரிக்க ஆரம்பித்தார்கள். மிகவும் வருத்தமுற்றாலும், தன் இறைவன் ஒருபோதும் தன்னைக் கைவிடமாட்டான் என்பதில் மட்டும் முஹம்மது நபி (ஸல்) அவர்கள் தீராத நம்பிக்கை கொண்டிருந்தார்கள்.

அந்த நம்பிக்கைதான் ஜிப்ரீல் (அலை) அவர்களை வரவழைத்தது என்று சொல்லவேண்டும்.  மறுநாளே பதிலளிப்பதாக முஹம்மது நபி (ஸல்) அவர்கள் சொன்னது தவறு என்று கடிந்துகொள்ளும் விதத்தில் ஓர் இறைவசனமே முதலில் வந்தது.

(நபியே!) இன்னும் எந்த விஷயத்தைப் பற்றியும் “நிச்சயமாக நாம் நாளை அதைச் செய்பவனாக இருக்கிறேன்” என்று நிச்சயமாக கூறாதீர்கள். “இன்ஷா அல்லாஹ் (அல்லாஹ் நாடினால்” என்று சேர்த்துச் சொன்னால்) அன்றி; தவிர, (இதை) நீர் மறந்து விடுங்கால் உம் இறைவனை நினைவு படுத்திக் கொள்வீராக; இன்னும், “என்னுடைய இறைவன், நேர் வழியில் இதை விட இன்னும் நெருங்கிய (விஷயத்)தை எனக்கு அறிவிக்கக்கூடும்” என்றும் கூறுவீராக!

– (அல் குர் ஆன் 18:23,24)

அதன் பிறகே மூன்று வினாக்களுக்கும் விடைகள் வெளிவந்தன.

– முஹம்மது சிராஜுத்தீன்